अभिषेक खतिवडा / हल्दिबारी । जहाँ शिक्षा उज्यालो छ, त्यहाँ भविष्य अन्धकार हुन सक्दैन। जहाँ साक्षरताको चेत खुल्छ, त्यहाँ समाजको बाटो फराकिलो हुन्छ। जहाँ स्वास्थ्यमा सजगता हुन्छ, त्यहाँ जीवन दीर्घ र समृद्ध हुन्छ।
यस्तै सकारात्मक परिवर्तनको जीवन्त उदाहरण बनेको छ हल्दिबारी गाउँपालिका — जहाँ एउटै मञ्चमा शिक्षा, स्वास्थ्य र चेतनाको साझा उत्सव मनाइएको छ।
गाउँपालिका अध्यक्ष रविन्द्र प्रसाद लिङ्देनको अध्यक्षता र पूर्व उपप्रधानमन्त्री तथा जलस्रोत तथा उर्जा मन्त्री राजेन्द्र लिङ्देनको प्रमुख आतिथ्यमा सम्पन्न कार्यक्रममा, पूर्ण साक्षरता, पूर्ण खोप सुनिश्चिता, दिगोपनाको लक्ष्य र गाउँ शिक्षा योजना सार्वजनिक गरियो।
कार्यक्रमकै विशेष अवसरमा एसईई २०८१ मा उच्चतम नतिजा ल्याउने ३२ जना विद्यार्थीहरूलाई सम्मान गरियो — जुन केवल पुरस्कार मात्र होइन, एक सन्देश थियो:
“हामी हाम्रा सपना साकार पार्न तयार छौं।”
कार्यक्रममा शिक्षा शाखा प्रमुख जानक कुमारी राईले साक्षरताको सम्भव यात्रा प्रस्तुत गरिन् भने स्वास्थ्य शाखा प्रमुख पुष्कर निरौलाले स्वास्थ्य क्षेत्रमा गरिएको निरन्तर प्रयास र चुनौतीहरूबारे जानकारी गराए।
जब प्रमुख अतिथि राजेन्द्र लिङ्देनले हल्दिबारीलाई पूर्ण साक्षर तथा पूर्ण खोप सुनिश्चिता पालिका घोषणा गर्दै भने:
“तपाईंहरू जुनसुकै क्षेत्रमा जानुहोस्, तर राम्रो मान्छे बन्न नछुटाउनुहोस् – इमानदार रहनुहोस् र कहिल्यै भ्रष्ट नबन्नुहोस्।” त्यस आवाज केवल प्रेरणाको थिएन, त्यो चेतनाको घण्टी थियो।
त्यसै क्रममा हल्दिबारी वडा नं. २ की कार्यवाहक वडा अध्यक्ष रचना कुलुङ राईले विद्यार्थीहरूलाई शुभकामना दिँदै भनिन्: “शिक्षामा गरिएको लगानी कहिल्यै व्यर्थ जाँदैन, किनभने यही शिक्षा तपाईंहरूको पहिचान बन्नेछ।”
उनले सामुदायिक र संस्थागत विद्यालयको नतिजाबीच देखिएको अन्तरप्रति चासो पनि व्यक्त गरिन्। यद्यपि, यो वर्षको एसईई नतिजामा उल्लेखनीय सुधार देखिएको छ — २०८० मा ४०% मात्र सफल विद्यार्थीको संख्या, अहिले ६६% पुगेको छ।
यो प्रगति केवल आँकडा होइन, जनताको विश्वास र शिक्षकहरूको श्रमको परिणाम हो।
कार्यक्रममा स्वागत मन्तव्य प्रमुख प्रशासकीय अधिकृत मानबहादुर वन (महेन्द्र)ले गर्नुभएको थियो भने सञ्चालन तथा सहजीकरण योजना शाखा प्रमुख राजन न्यौपानेले कुशलतापूर्वक गर्नुभएको थियो।
