बिसंगति कविता
ऐल्ता , पाएडर दिए .. घर ढालानु ,
घरेर बेर्छानी .. निक्लिल् चँक्चँकाए।
हाए ! हाए! कर्नु .. मुई बेर्छानीक्
दुनियाँ देखिल रे .. हँकमकाए ।।
बाछ्रा परिल मोर .. घर ,ऐग्ना बारीला,
घरत जाल्सी ढुकिल रे .. लँकपकाए।
सोदोर बनिल मोर .. माँक्रा , टिक्टिकीला
चार्ह बितिर बेराचे रे .. सँक्पकाए।।
देख्वार जुग आसिल .. बाहिरा दुनियाँक्
बेर्छानीक साजुवा हचे .. फेर झँकमकाँए।
पहिरनते माहाँगा .. सँना-चाँनी गाहाना,
जाँनिए लागुवा हचे रे .. दिल झँकाए ।।
जुगे देखिए लोकक् .. गियान सिकाले,
कोईखुना चखुलाअ् .. जाँछे चँकबँकाए।
चखु कि जाने ? .. आत्मा भित्रेर बाँखान,
कोईखुना कलेजाअ् .. उठेचे दँगमगाए।।
घर सिर्जी त .. चलेना घरेर बाते ,
काम काँजलाअ .. देखे रे टँकटकाए।
हातते दिँया .. रंगीन टिभी, मोबाइल
काँहारअ् बातलाअ् .. त ना सँकाए ।।
सुधी होले केनङ् .. पर भरेर बुद्धि
बुधीयार बुद्धि .. कि कर्बे रँकरकाए।
आपुन बुद्धिर .. जुग जामाना आसिल,
आप त बुधियाक ..बेरुवा हबे ठँकठकाए ।।
जोगेन्द्र प्रसाद राजवंशी
कचनकवल :- ३, दल्की झापा
हाल :- मलेसिया
